(Mogadishu-Xog-ogaal) Guddomiyaha guddiga doorashada Soomaaliya Maxamed Xasan Cirro ayaa sheegay inay doorashadu soconayso oo aan loo joojinayn baaqa kasoo yeeray midowga musharraxiinta Soomaaliya.
Guddoomiye Cirro ayaa sheegay in aanay marnaba xalka ku jirin in doorashada la hakiyo, isagoo sheegay intaas bedelkeed la xallin karo wixii tabasho oo doorashada ka dhashay.
Guddoomiyuhu wuxuu sheegay inuu soo dhoweynayo in la isku yimaado oo laga tashado sidii horey loogu socon lahaa, si meesha looga saaro taag taaga doorashadana ugu qabsoomto waqtigeeda.
Wuxuu sheegay guddoomiyuhu in ay guddigoodu ku shaqeynayaan heshiis siyaasadeed oo aanay dhinacna uga beeri karin, wuxuuna ugu baaqay midowga musharraxiinta in ay ku kalsoonaadaan dadaalka guddiyadu doorashu wadaan.
“In guddiyadeennu wixii ay qaldamay ay saxaan waa waajib lagu leeyahay. Laakiin waxay u baahan tahay dhinacyo badan oo iskaashi leh,” ayuu yiri Cirro.
Dhowaan ahay ahayd markii golaha midowga musharraxiintu ay dalbadeen in dib loo dhigo doorashada, lagana wada hadlo sidii loo sixi lahaa waxa qaldamay.
